##Harivamsha Maha Puranam - ViShNu Parva - 
Chapter 6- Elimination of Sakatasura and Putana
Itranslated and proofread by K S Rmachandran
ramachandran_ksr@yahoo.ca, March 5, 2008## 

Further proof-read by Gilles Schaufelberger schaufel @ wanadoo.fr
If you find any errors compared to Chitrashala Press edn,
send corrections to A. Harindranath harindranath_a @ yahoo.com
----------------------------------------------------------------
    
    atha ShaShTho.adhyAyaH
    shakaTabha~NgapUtanAvadhau
     
     vaishaMpAyana uvAcha 

     tatra tasyAsataH kAlaH sumahAnatyavartata |
     govraje nandagopasya ballavatvaM prakurvataH ||2-6-1
     dArakau kR^itanAmAnau vavR^idhAte sukhaM cha tau |
     jyeShThaH  saMkarShaNo nAma kanIyAnkR^iShNa eva tu ||2-6-2
     meghakR^iShNastu kR^iShNo.abhUddehAntaragato hariH |
     vyavardhata gavAM madhye sAgarasya ivAmbudaH |2-6-3
     shakaTasya tvadhaH suptaM kadAchitputragR^iddhinI |
     yashodA taM samutsR^ijya jagAma yamunAM nadIm ||2-6-4
     shishulIlAM tataH kurvansa hastacharaNau kShipan |
     ruroda madhuraM kR^iShNaH pAdAvUrdhvaM prasArayan ||2-6-5
     sa tatraikena pAdena shakaTaM paryavartayat |
     nyubjaM payodharAkA~NkShI chakAra cha ruroda cha ||2-6-6
     etasminnantare prAptA yashodA bhayaviklavA |
     snAtA prasravadigdhA~NgI baddhAvatseva saurabhI ||2-6-7
     sA dadarsha viparyastaM shakaTaM vAyunA vinA |
     hAheti kR^itvA tvaritA dArakaM jagR^ihe tadA ||2-6-8
     na sA bubodha tattvena shakaTaM parivartitam |
     svasti te dArakAyeti prItA bhItApi sAbhavat ||2-6-9 
     kiM tu vakShyati te putra pitA paramakopanaH |
     tvayyadhaH shakaTe supte akasmAchcha viloDite ||2-6-10
     kiM me snAnena duHsnAnaM kiM cha me gamane nadIm |
     paryaste shakaTe putra yA tvAM pashyAmyapAvR^itam ||2-6-11
     etasminnantare gobhirAjagAma vanecharaH |
     kAShAyavAsasI bibhrannandagopo vrajAntikam ||2-6-12
     sa dadarsha viparyastaM bhinnabhANDaghaTIghaTam |
     apAstadhUrvibhinnAkShaM shakaTaM chakramolinam ||2-6-13
     bhItastvaritamAgatya sahasA sAshrulochanaH |
     api me svasti putrAyetyasakR^idvachanaM vadan ||2-6-14
     pibantaM stanamAlakShya putraM svastho.abravItpunaH |
     vR^iShayuddhaM vinA kena paryastaM shakaTaM mama ||2-6-15
     pratyuvAcha yashodA taM bhItA gadgadabhAShiNI |
     na vijAnAmyahaM kena shakaTaM parivartitam |
     ahaM nadIM gatA saumya chailaprakShAlanArthinI |
     AgatA cha viparyastamapashyaM shakaTaM bhuvi ||
     tayoH kathayatorevamabruvaMstatra dArakAH |
     anena shishunA yAnametatpAdena loDitam ||2-6-18
     asmAbhiH saMpatadbhishcha dR^iShTametadyadR^ichChayA |
     nandagopastu tachChrutvA vismayaM paramaM yayau ||2-6-19
     prahR^iShTashchaiva bhItashcha kimetaditi chintayan |
     na cha te shraddhadhurgopAH sarve mAnuShabuddhayaH ||2-6-20
     Ashchayamiti te sarve vismayotphullalochanAH |
     sve sthAne shakaTaM prApya chakrabandhamakAkrayan ||2-6-21
     
     vaishaMpAyana uvAcha 
     
     kasyachittvatha kAlasya shakunI veShadhAriNI |
     dhAtrI kaMsasya bhojasya pUtaneti parishrutA ||2-6-22
     pUtanA nAma shakunI ghorA prANabhaya~NkarI |
     AjagAmArdharAtre vai pakShau krodhAdvidhunvatI ||2-6-23
     tato.ardharAtrasamaye pUtanA pratyadR^ishyata |
     vyAghragaMbhIranirghoShaM vyAharantI punaH punaH ||2-6-24
     nililye shakaTasyAkShe prasravotpIDavarShiNI |
     dadau stanaM cha kR^iShNAya tasminsupte jane nishi ||2-6-25
     tasyAH stanaM papau kR^iShNaH prANaiH saha vinadya cha |
     ChinnastanI tu sahasA papAta shakunI bhuvi ||2-6-26
     tena shabdena vitrastAstato bubudhire bhayAt |
     sa nandagopo gopA vai yashodA cha suviklavA ||2-6-27
     te tAmapashyanpatitAM visa~nj~nAM vipayodharAm |
     pUtanAM patitAM bhUmau vrajeNeva vidAritAm ||2-6-28
     idaM kiM tviti saMtrastAH kasyedaM karma chetyapi |
     nandagopaM puraskR^itya gopAste paryavArayan ||2-6-29
     nAdhyagachChanta cha tadA hetuM tatra kadAchana |
     AshcharyamAshcharyamiti bruvanto.anuyayurgR^ihAn ||2-6-30
     gateShu teShu gopeShu vismiteShu yathAgR^iham |
     yashodAM nandagopastu paprachCha gatasaMbhramaH ||2-6-31
     ko.ayaM vidhirna jAnAmi vismayo me mahAnayam |
     putrasya me bhayaM tIvraM bhIrutvaM samupAgatam ||2-6-32
     yashodA tvabravIdbhItA nArya jAnAmi kiM tvidam |
     dArakeNa sahAnena suptA shabdena bodhitA ||2-6-33
     yashodAyAmajAnantyAM nandagopaH sabAndhavaH |
     kaMsAdbhayaM chakArograM vismayaM cha jagAma ha ||2-6-34 
     
     iti shrImahAbhArate khileShu harivAMshe viShNuparvaNi shishucharyAyAM
shakaTabha~NgapUtanAvadhe ShaShTho.adhyAyaH