##Harivamsha Maha Puranam - Part 2- ViShnu Parva`
Chapter 5 - Nanda Relocating to Vraja
Itranslated and proofread by K S Ramachandran
ramachandran_ksr@yahoo.ca, February 29, 2008##

Further proof-read by Gilles Schaufelberger schaufel @ wanadoo.fr
If you find any errors compared to Chitrashala Press edn,
send corrections to A. Harindranath harindranath_a @ yahoo.com
----------------------------------------------------------------
   atha pa~nchamo.adhyAyaH 
       nandavrajagamanam 

       vaishaMpAyana uvAcha 

       prAgeva vasudevastu vraje shushrAva rohiNIm |
       prajAtAM putramevAgre chandrAtkAntatarAnanam ||2-5-1
       sa nandagopaM tvaritaH provAcha shubhayA girA |
       gachChAnayA sahaiva tvaM vrajameva yashodayA ||2-5-2
       tatra tau dArakau gatvA jAtakarmAdibhirguNaiH |
       yojayitvA vraje tAta saMvardhaya yathAsukham ||2-5-3
       rauhiNeyaM cha putraM me parirakSha shishuM vraje |
       ahaM vAchyo bhaviShyAmi pitR^ipakSheShu putriNAm ||2-5-4
       yo.ahamekasya putrasya na pashyAmi shishormukham |
       hriyate hi balAtpraj~nA prAj~nasyApi tato mama ||2-5-5
       asmAddhi me bhayaM kaMsAnnirghR^iNAdvai shishorvadhe |
       tadyathA rauhiNeyaM tvam nandagopaM mamAtmajam ||2-5-6
       gopAyasi yathA tAta tattvAnveShI tathA kuru |
       vighnA hi bahavo loke bAlAnuttrAsayanti hi ||2-5-7
       sa cha putro mama jyAyAnkanIyAMshcha tavApyayam |
       ubhAvapi samaM nAmnA nirIkShasva yathAsukham ||2-5-8
       vardhamAnAvubhAvetau samAnavayasau yathA |
       shobhetAM govraje tasminnandagopa tathA kuru||2-5-9
       bAlye kelikilaH sarvo bAlye muhyati mAnavaH |
       bAlye chaNDatamaH sarvastatra yatnaparo bhava ||2-5-10
       na cha vR^indAvane kAryo gavAM ghoShaH kathaMchana |
       bhetavyaM tatra vasataH keshinaH pApadarshinaH ||2-5-11
       sarIsR^ipebhyaH kITebhyaH shakunibhyastathaiva cha |
       goShTheShu gobhyo vatsebhyo rakShyau te dvAvimau shishU ||2-5-12
       nandagopa gatA rAtriH shIghrayAno vrajAshugaH |
       ime tvAM vyAharantIva pakShiNaH savyadakShiNam ||2-5-13
       rahasyaM vasudevena so.anuj~nAto mahAtmanA |
       yAnaM yashodayA sArdhamAruroha mudAnvitaH ||2-5-14
       kumAraskandhavAhyAyAM shibikAyAM samAhitaH |
       saMveshayAmAsa shishuM shayanIyaM mahAmatiH ||2-5-15
       jagAma cha viviktena shItalAnilasarpiNA |
       bahUdakena mArgeNa yamunAtIragAminA ||2-5-16
       sa dadarsha shubhe deshe govardhanasamIpage |
       yamunAtIrasaMbaddhashItamArutasevitam ||2-5-17
       virutashvApadai ramyaM latAvallImahAdrumam |
       gobhistR^iNavilagnAbhiH syandantIbhirala~NkR^itam ||2-4-18
       samaprachAraM cha gavAM samatIrthajalAshayam |
       vR^iShANAM skandhaghAtaishcha viShANodghR^iShTapAdapam ||2-4-19
       bhAsAmiShAdAnusR^itaiH shyenaishchAmiShagR^idhnubhiH |
       sR^igAlamR^igasiMhaishcha vasAmedAshibhirvR^itam ||2-4-20
       shArdUlashabdAbhirutaM nAnApakShisamAkulam |
       svAduvR^ikShaphalaM ramyaM paryAptatR^iNavIrudham ||2-5-21
       govrajaM gorutaM ramyaM gopanArIbhirAvR^itam |
       hambhAravaishcha vatsAnAM sarvataH kR^itaniHsvanam ||2-5-22
       shakaTAvartavipulaM kaNTakIvATasa~Nkulam |
       paryanteShvAvR^itaM vanyairbR^ihadbhiH patitairdrumaiH ||2-5-23
       vatsAnAM ropitaH kIlairdAmabhishcha vibhUShitam |
       karIShAkIrNavasudhaM kaTachChannakuTImaTHam ||2-5-24
       kShemyaprachArabahulaM hR^iShTapuShTajanAvR^itam |
       dAmanIpAshabahulaM gargarodgAraniHsvanam ||2-5-25
       takrAniHsrAvamalinaM dadhimaNDArdramR^ittikam |
       manthAnavalayodgArairgopInAM janitasvanam ||2-5-26
       kAkapakShadharairbAlairgopAlakrIDanAkulam|
       sArgaladvAragovATaM madhye gosthAnasamkulam ||2-5-27
       sarpiShA pachyamAnena surabhIkR^itamArutam |
       nIlapItAMbarAbhishcha taruNIbhirala~NkR^itam ||2-5-28
       vanyapuShpAvataMsAbhirgopakanyAbhirAvR^itam |
       shirobhirdhR^itakumbhabhirbaddhairagrastanAmbaraiH ||2-5-29
       yamunAtIramArgeNa jalahArIbhirAvR^itam |
       sa tatra pravishanhR^iShTo govrajaM gopanAditam ||2-5-30
       pratyudgato gopavR^iddhaiH strIbhirvR^iddhAbhireva cha |
       niveshaM rochayAmAsa parivarte sukhAshraye ||2-5-31
       sA yatra rohiNI devI vasudevasukhAvahA |
       tatra taM bAlasUryAbhaM kR^iShNaM gUDhaM nyaveshayat ||2-5-32 
         
         iti shrImahAbhArate khileShu harivaMshe vihSNuparvaNi 
                 govrajagamanaM  nAma pa~nchamo.adhyAyah