## Harivamsa Maha Puranam - Part 2 - Vishnu Parva
Chapter 20 - Krishna and Gopis Play Music
Itranslated by K S Ramachandran ramachandran_ksr@yahoo.ca, May 25, 2008##

Further proof-read by Gilles Schaufelberger schaufel @ wanadoo.fr
If you find any errors compared to Chitrashala Press edn,
send corrections to A. Harindranath harindranath_a @ yahoo.com
----------------------------------------------------------------

  atha viMsho.adhyAyaH
     hallIsakakrIDanam
     
     vaishampAyana uvAcha

     gate shakre tataH kR^ihNaH pUjyamAno vrajAlayaiH |
     govardhanadharaH shrImAnvivesha vrajameva ha ||2-20-1
     tasya vR^iddhAbhinandanti j~nAtayashcha sahoShitAH |
     dhanyAH smo.anugR^ihItAH smastvadvR^ittena nayena cha ||2-20-2
     gAvo varShabhayAttIrNA vayaM tIrNA mahAbhayAt |
     tava prasAdAdgovinda devatulyaparAkrama ||2-20-3
     amAnuShANi karmANi tava pashyAma gopate |
     dhAraNenAsya shailasya vidmastvAM kR^iShNa daivatam ||2-20-4
     kastvaM bhavasi rudrANAM marutAM cha mahAbalaH |
     vasUnAM vA kimarthaM cha vasudevaH pitA tava ||2-20-5
     balaM cha bAlye krIDA cha janma chAsmAsu garhitam |
     kR^iShNa divyA cha te cheShTA sha~NkitAni manAMsi naH ||2-20-6
     kimarthaM gopaveSheNa ramase.asmAsu garhitam |
     lokapAlopamashchaiva gAstvaM kiM parirakShasi ||2-20-7
     devo vA dAnavo vA tvaM yakSho gandharva eva vA |
     asmAkaM bAndhavo jAto yo.asi so.asi namo.astu te ||2-20-8
     kenachidyadi kAryeNa vasasIha yadR^ichChayA |
     vayaM tavAnugAH sarve bhavantaM sharaNaM gatAH ||2-20-9
     
     vaishampAyana uvAcha 
     gopAnAM vachanaM shrutvA kR^iShNaH padmadalekshaNaH |
     pratyuvAcha smitaM kR^itvA j~nAtInsarvAnsamAgatAn ||2-20-10
     manyante mAM yathA sarve bhavanto bhImavikramam |
     tathAhaM nAvamantavyaH svajAtIyo.asmi bAndhavaH ||2-20-11
     yadi tvavashyaM shrotavayaM kAlaH sampratipAlyatAm |
     tato bhavantaH shroShyanti mAm cha drakShyanti tattvataH ||2-20-12
     yadyayaM bhavatAM shlAghyo bAndhavo devasaprabhaH |
     parij~nAnena kiM kAryaM yadyeSho.anugraho mama ||2-20-13
     evamuktAstu te gopA vasudevasutena vai |
     baddhamaunA dishaH sarve bhejire pihitAnanAH ||2-20-14
     kR^iShNastu yauvanaM dR^iShTvA nishi chandramaso vanam |
     shAradIM cha nishAM ramyAM manashchakre ratiM prati ||2-20-15 
     sa karIShA~NgarAgAsu vrajarathyAsu vIryavAN |
     vR^iShANAM jAtadarpANAM yuddhAni samayojayat |2-20-16
     gopAlAMshcha balodagrAnyodhayAmAsa vIryavAn |
     vane sa vIro gAshchaiva jagrAha grAhavadvibhuH ||2-20-17
     yuvatIrgopakanyAshcha rAtrau saMkAlya kAlavit | 
     keshorakaM mAnayanvai saha tAbhirmumoda ha | 2-20-18
     tAstasya vadanaM kAntaM kAntA gopastriyo nishi |
     pibanti nayanAkShepairgAM gataM shashinaM yathA ||2-20-19
     haritAlArdrapItena sakausheyena vAsasA |
     vasAno bhadravasanaM kR^iShNaH kAntataro.abhavat ||2-20-20
     sa baddhA~NgadanirvyUhashchitrayA vanamAlayA |
     shobhamano hi govindaH shobhayAmAsa tadvrajam ||2-20-21
     nAma dAmodaretyevaM gopakanyAstadAbruvan |
     vichitraM charitaM ghoShe dR^iShTvA tattasya bhAsvataH ||2-20-22
     tAstaM payodharottu~NgairurobhiH samapIDayan |
     bhrAmitAkShaishcha vadanairnirIkShante  varA~NganAH ||2-20-23
     tA vAryamANAH patibhirmAtR^ibhirbhrAtR^ibhistathA |
     kR^iShNaM gopA~NganA rAtrau mR^igayante ratipriyAH ||2-20-24
     tAstu pa~NktIkR^itAH sarvA ramayanti manoramam |
     gAyantyaH kR^iShNacharitaM dvandvasho gopakanyakAH ||2-20-25
     kR^iSNalIlAnukAriNyaH kR^iShNapraNihitekShaNAH |
     kR^iShNasya gatigAminyastaruNyastA varA~NganAH ||2-20-26
     vaneShu tAlahastAgraiH kUjayantyastathAparAH |
     cherurvai charitaM tasya kR^iShNasya vrajayoShitaH ||2-20-27
     tAstasya nR^ityaM gItaM cha vilAsasmitavIkShitam |  
     muditAshchAnukurvantyaH krIDanti vrajayoShitaH  ||2-20-28
     bhAvanispandamadhuraM gAyantyastA varA~NganAH |
     vrajaM gatAH sukhaM cherurdAmodaraparAyaNAH ||2-20-29 
     karIShapAMsudigdhA~NgyastAH kR^iShNAmanuvavrire |
     ramayantyo yatha nAgaM saMpramattaM kareNavaH ||2-20-30
     tamanyA bhAvavikachairnetraiH prahasitAnanAH |
     pibantyatR^iptavanitAH kR^iShNaM kR^iShNamR^igekShanAH ||2-2-31
     mukhamasyAbjasaMkAshaM tR^iShitA gopakanyakAH |
     ratyantaragatA rAtrau pibanti rasalAlasAH ||2-20-32
     hA heti kurvatastasya prahR^iShTAstA varA~NganAH |
     jagR^ihurnissR^itAM vANIM nAmnA dAmodareritAm ||2-20-33
     tAsAM grathitasImaMtA ratiM nItvA.a.akulIkR^itAH |
     chAru visraMsire keshAH kuchAgre gopayoShitAm ||2-20-34
     evaM sa kR^iShNo gopInAM chakravAlairalaMkR^itaH |
     shAradIShu sachandrAsu nishAsu mumude sukhI ||2-20-35 
     
        iti srimahAbhArate khileShu harivaMshe viShNuparvaNi
                 hallIsakakrIDane viMsho.adhyAyaH