##Harivamsha Maha Puranam - Part 1 - Vishnu Parva
Chapter 13 - Elimination of Dhenuka
Itranslated by KSRamachandran,
ramachandran_ksr@yahoo.ca, April 12, 2008##
Further proof-read by Gilles Schaufelberger schaufel @ wanadoo.fr
If you find any errors compared to Chitrashala Press edn,
send corrections to A. Harindranath harindranath_a @ yahoo.com
----------------------------------------------------------------

   atha tryodasho.adhyAyaH
        dhenukavadhaH
        
        vaishampAyana uvAcha 
        
        damite sarparAje tu kR^iShNena yamunAhrade |
        tameva cheraturdeshaM sahitau rAmakeshavau ||2-13-1
        Ajagmatustau sahitau godhanaiH saha gominau |
        giriM govardhanaM ramyaM vasudevasutAvubhau ||2-13-2
        govardhanasyottarato yamunAtIramAshritam |
        dadR^ishAte cha tau vIrau ramyaM tAlavanaM mahat||2-13-3
        tau tAlaparNapratate ramye tAlavane ratau | 
        cheratuH paramaprItau vR^iShapotAvivoddhatau||2-13-4
        sa tu deshaH sadA snigdho loShThapAShANavarjitaH |
        darbhaprAyasthalIbhUtaH sumAhAnkR^iShNamR^ittikaH ||2-13-5
        tAlaistairvipulaskandhairuchChritaiH shyAmaparvabhiH |
        phalAgrashAkhibhirbhAti nAgahastairivochChritaiH ||2-13-6
        tatra dAmodaro vAkyamuvAcha vadatAM varaH |
        aho tAlaphalaiH pakvairvAsiteyaM vanasthalI ||2-13-7
        svAdUnyArya sugandhIni shyAmAni rasavanti cha |
        pakvatAlAni sahitau pAtayAmo laghukramau ||2-13-8
        yadyeShAmIdR^isho gandho mAdhuryaghrANatarpaNaH |
        rasenAmR^itakalpena bhavitavyaM cha me matiH ||2-13-9
        dAmodaravachaH shrutvA rauhiNeyo hasanniva |
        pAtayanpakvatAlAni chAlayAmAsa tAMstarUn ||2-13-10
        tattu tAlavanaM nR^INAmasevyaM duratikramam |
        nirmANabhUtamiriNaM puruShAdAlayopamam ||2-13-11
        dAruNo dhenuko nAma daityo gardabharUpadhR^ik |
        kharayUthena mahatA vR^itaH samanusevate ||2-13-12
        sa tu tAlavanaM ghoraM gardabhaH parirakShati |
        nR^ipakShishvApadaganAMstrAsayAnaH sudurmatiH ||2-13-13
        tAlashabdaM sa taM shrutvA saMghuShTaM phalapAtanAt |
        nAmarShayatsa saMkruddhastAlasvanamiva dvipaH ||2-13-14
        shabdAnukArI saMkruddho darpAviddhasaTAnanaH |
        stabdhAkSho heShitapaTuH khurairnirdArayanmahIm ||2-13-15
        AviddhapuchCho hR^iShito vyAttAnana ivAntakaH |
        Apatanneva dadR^ishe rauhiNeyamupasthitam ||2-13-16
        tAlAnAM tamadho dR^iShTvA sa dhvajAkAramavyayam |
        rauhiNeyaM kharo duShTaH so.adashaddashanAyudhaH ||2-13-17
        padbhyAmubhAbhyAM cha punaH pashchimAbhyAM parA~NmukhaH |
        jaghAnorasi daityendro rauhiNeyaM nirAyudham ||2-13-18
        tAbhyAMeva sa jagrAha padbhyAM taM daityagardabham |
        AvarjitamukhaskandhaM prerayaMstAlamUrdhani ||2-13-19
        saMmagnorukaTigrIvo bhagnapR^iShTho durAkR^itiH |
        kharastAlaphalaiH sArdhaM papAta dharaNItale||2-13-20
        taM gatAsuM gatashrIkaM patitaM vIkShya gardabham |
        j~nAtIMstathAparAMstasya tR^iNarAjani so.akShipat ||2-13-21
        sA bhUrgardabhadehaishcha tAlaiH pakvaishcha pAtitaiH |
        babhAse ChannajaladA dyaurivAvyaktashAradI ||2-13-22
        tasmingardabhadaitye tu sAnuge vinipAtite |
        ramyaM tAlavanaM taddhi bhUyo ramyataraM babhau ||2-13-23
        vipramuktamayaM shubhraM viviktAkAradarshanam |
        charanti sma sukhaM gAvastattAlavanamuttamam ||2-13-24
        tataH praviShTAste sarve gopA vanavichAriNaH |
        vItashokabhayAyAsAshcha~nchUryante samantataH ||2-13-25
        tataH sukham prakIrNAsu	goShu nAgendravikramau |
        drumaparNAsanaM kR^itvA tau yathArhaM niShIdatuH ||2-13-26
        
        iti shrImahAbhArate khileshu harivaMshe viShNuparvaNi
shishucharyAyAM dhenukavadhe trayodasho.adhyAyaH