## Harivamsha Mahapuranam - Part 1 -
Harvamsha Parva
Chapter 49
Description  of  Loka
Itranslated and proofread by K S Ramachandran
ramachandran_ksr@yahoo.ca, December 15, 2007##                                

Further proof-read by Gilles Schaufelberger, schaufel @ wanadoo.fr
If you find any errors compared to Chitrashala Press edn,
send corrections to A. Harindranath, harindranath_a @ yahoo.com
-------------------------------------------------------------------


atha ekonapa~nchAshattamo.adhyAyaH 
      lokavarNanam
      
      janamejaya uvAcha 
      
      brahmanA devadevena sArdhaM salilayoninA |
      brahmalokagato brahmanvaikuNThaH kiM chakAra ha ||1-49-1
      kimarthe chAdidevena nItaH kamalayoninA |
      viShNurdaityavadhe vR^itte devaishcha kR^itasatkriyaH ||1-49-2
      brahmaloke cha kiM sthAnaM kaM vA yogamupAsta saH |
      kaM vA dadhAra niyamaM sa vibhurbhUtabhAvanaH ||1-49-3
      kathaM tasyA.a.asatastatra vishvaM jagadidaM mahat |
      shriyamApnoti vipulAM surAsuranarArchitAm ||1-49-4
      kathaM svapiti gharmAnte budhyate chAmbudaplave |
      kathaM cha brahmalokastho dhuraM vahati laukikAm ||1-49-5
      charitaM tasya viprendra divyaM bhagavato divi |
      vistareNa yathAtattvaM sarvamichChAmi veditum ||1-49-6
      
      vaishampAyana uvAcha 
      
      shR^iNu nArAyaNasyAdau vistareNa pravR^ittayah |
      brahmalokaM yathArUDho brahmaNA saha modate  ||1-49-7
      kAmam tasya gatiH sUkShmA devairapi durAsadA |
      yattu vakShyAmyahaM rAjaMstanme nigadataH shR^iNu ||1-49-8
      eSha lokamayo devo lokAshchaitanmayAstrayaH |
      esha devamayashchaiva devAshchaitanmayA divi ||1-49-9
      tasya pAraM na pashyanti bahavaH pArachintakAH |
      esha pAraM paraM chaiva lokAnAM veda mAdhavaH ||1-49-10
      asya devAndhakArasya mArgitavyasya daivataiH |
      shR^iNu vai yattadA vR^ittaM brahmaloke purAtanam ||1-49-11
      sa gatvA brahmaNo lokaM dR^iShTvA paitAmahaM padam |
      vavande tAnR^iShInsarvAnviShNurArSheNa karmanA ||1-49-12
      so.agniM prAksavaNe dR^iShTvA hUyamAnaM maharShibhiH |
      avandata mahAtejAH kR^itvA paurvAhnikIM kriyAm ||1-49-13
      sa dadarsha makheShvAjyairijyamAnaM maharShibhiH |
      bhAgaM yaj~niyamashnAnaM svadehamaparaM sthitam ||1-49-14
      abhivAdyAbhivAdyAnAmR^iShINAM brahmavarchasAm |
      parichakrAma so.achintyo brahmalokaM sanAtanam ||1-49-15 
      sa dadarshochChritAnyUpAMshchaShAlAgravibhUShitAN |
      makheShu cha brahmarShibhiH shatashaH kR^italakShaNAn ||1-49-16
      AjyadhUmaM samAghrAya shR^iNvanvedAndvijeritAn |
      yaj~nairijyaM  tamAtmAnaM pashyaMstatra chachAra ha ||1-49-17
      UchustamR^iShayo devAH sadasyAH sadasi sthitAH |
      arghyodyatabhujAH sarve pavitrAntarapANayaH ||1-49-18
      deveShu vartate yadvai taddhi sarvaM janArdanAt |
      yatpravR^ittaM cha devebhyastadviddhi madhusUdanAt ||1-49-19
      agnIShomamayaM lokaM yaM vidurviduSho janAH |
      taM somamagniM lokaM cha veda viShNuM sanAtanam ||1-49-20
      kShIrAdyathA dadhi bhaveddadhnaH sarpirbhavedyathA |
      mathyamAneShu bhUteShu tathA loko janArdanAt ||1-49-21
      yathendriyaishcha bhutaishca paramAtmAbhidhIyate |
      tathA devaishcha vedaishcha lokaishcha vihito hariH ||1-49-22
      yathA bhUtendriyAvAptirvihitA bhuvi dehinAm |
      tathA prANeshvarAvAptirdevAnAM divi vaiShNavI ||1-49-23
      satriNAM satraphaladaH pavitraM paramAtmavAn |
      lokatantradharo hyeSha mantrairmantra ivochyate |1-49-24
      
      R^iShaya UchuH 
       
       svAgataM te surashreShTha padmanAbha mahAdyute |
       idaM yaj~niyamAtithyaM mantrataH parigR^ihyatAm ||1-49-25
       tvamasya yaj~napUtasya pAtram pAdyasya pAvanaH |
       atithistvaM hi mantroktaH sa dR^iShTaH santatam mataH ||1-49-26
       tvayi yoddhum gate viShNau na prAvartanta naH kriyAH |
       avaiShNavasya yaj~nasya na hi karma vidhIyate ||1-49-27
       sadakShiNasya yaj~nasya tvatprasUtiH phalaM bhavet |
       adyAtmAnamihAsmAbhirijyamAnaM nirIkShyase ||1-49-28
       evamastviti tAnsarvAnbhagavAnpratyapUjayat |
       mumude bahmalokastho brahmA lokapitAmahaH ||1-49-29
       
       iti shrImahAbhArate khileShu harivaMshe harivaMshaparvaNi
       lokavarNanaM nAma  ekonapa~nchAshattamo.adhyAyaH