## Harivamshamahapuranam - Part 1 - Harivamsha Parva
Chapter 39 - Akruracharitam
Itranslated and proofread by K S Ramachandran,
ramachandran_ksr@yahoo.ca, August 30, 2007

Further proof-read by Gilles Schaufelberger, schaufel @ wanadoo.fr
If you find any errors compared to Chitrashala Press edn,
send corrections to A. Harindranath, harindranath_a @ yahoo.com
---------------------------------------------------------------------


   atha ekonachatvAriMsho.adhyAyaH
      akrUracharitam
      
      vaishampAyana uvAcha 

      yattatsatrAjite kR^iShNo maNiratnaM syamantakam |
      adAttaddhArayAmAsa babhrurvai  shatadhanvanA || 1-39-1
      yadA hi prArthayAmAsa satyabhAmAmaninditAm |
      akrUro.antaramanvichChanmaNiM chaiva syamantakam || 1-39-2
      satrAjitaM tato hatvA shatadhanvA mahAbalaH |
      rAtrau tanmaNimAdAya tato.akrUrAya dattavAn || 1-39-3
      akrUrastu tato ratnamAdAya bharatarShabha |
      samayaM kArayAMchakre nAvedyo.ahaM tvayetyuta || 1-39-4
      vayamabhyupayAsyAmaH kR^iShNena tvAmabhidrutam |
      mamAdya dvArakA sarvA vashe tiShThatyasaMshayam || 1-39-5
      hate pitari duHkhArtA satyabhAmA yashasvinI |
      prayayau rathamAruhya nagaraM vAraNAvatam || 1-39-6
      satyabhAmA tu tadvR^ittaM bhojasya shatadhanvanaH |
      bharturnivedya duHkhArtA pArshvasthAshrUNyavartayat || 1-39-7
      pANDavAnAM tu dagdhAnAM hariH kR^itvodakakriyAm |
      kulyArthe chApi pANDUnAM nyayojayata sAtyakim || 1-39-8
      tatastvaritamAgatya dvArakAM madhusUdanaH |
      pUrvajaM halinaM shrImAnidaM vachanamabravIt || 1-39-9
      hataH prasenaH siMhena satrAjichChatadhanvanA |
      syamantakaH sa madgAmI tasya prabhurahaM vibho || 1-39-10
      tadAroha rathaM shIghraM bhojaM hatvA mahAbalam |
      syamantako mahAbAho hyasmAkaM sa bhaviShyati || 1-39-11
      tataH pravavR^ite yuddhaM tumulaM bhojakR^iShNayoH |
      shatadhanvA tato.akrUramavaikShatsarvatodisham || 1-39-12
      saMrabdhau tAvubhau dR^iShTvA tatra bhojajanArdanau |
      shakto.api shAThyAddhArdikyamakrUro nAbhyapadyata || 1-39-13  
      apayAne tato buddhiM bhojashchakre bhayArditaH |
      yojanAnAM shataM sAgraM hayayA pratyapadyata || 1-39-14
      vikhyAtA hR^idayA nAma shatayojanagAminI |
      bhojasya vaDavA rAjanyayA kR^iShNamayodhayat || 1-39-15
      kShINAM javena cha hayAmadhvanaH shatayojane |
      dR^iShTvA rathasya tAM vR^iddhiM shatadhanvAnamArdayat || 1-39-16
      tatastasyA hayAyAstu shramAtkhedAchcha bhArata |
      khamutpeturatha prANAH kR^iShNo rAmamathAbravIt || 1-39-17
      tiShThasveha mahAbAho dR^iShTadoShA hayA mayA |
      padbhyAM gatvA hariShyAmi manIratnaM syamantakam || 1-39-18
      padbhyAmeva tato gatvA shatadhanvAnamachyutaH |
      mithilAmabhito rAjanjaghAna paramAstravit || 1-39-19
      syamantakaM cha nApashyaddhatvA bojaM mahAbalam |
      nivR^ittaM chAbravItkR^iShNaM ratnaM dehIti lA~NgalI || /1-39-20
      nAstIti kR^iShNashchovAcha tato rAmo ruShAnvitaH |
      dhikChabdamasakR^itkR^itvA pratyuvAcha janArdanam || 1-39-21
      bhrAtR^itvAnmarShayAmyeSha (?) svasti te.astu vrajAmyaham  |
      kR^ityaM na me dvArakayA na tvayA na cha vR^iShNibhiH  || 1-39-22
      pravivesha tato rAmo mithilAmarimardanaH |
      sarvakAmairupachitairmaithilenAbhipUjitaH || 1-39-23
      etasminneva kAle tu babhrurmatimatAM varaH |
      nAnArUpAnkratUnsarvAnAjahAra nirargalAn || 1-39-24
      dIkShAmayaM sa kavachaM rakShArthaM pravivesha ha |
      syamantakakR^ite prAj~no gAndIputro mahAyashAH || 1-39-25
      atha ratnAni chAgryANi dravyANi vividhAni cha |
      ShaShTiM varShANi dharmAtmA yaj~neShu viniyojayat || 1-39-26
      akrUrayaj~nA iti te khyAtAstasya mahAtmanaH |
      bahvannadakShiNAH sarve sarvakAmapradAyinaH || 1-39-27
      atha duryodhano rAjA gatvA tu mithilAM prabhuH |
      gadAshikShAM tato divyAM balabhadrAdavAptavAn || 1-39-28
      prasAdya tu tato rAmo vR^iShNyandhakamahArathaiH |
      AnIto dvArakAmeva kR^iShNena cha mahAtmanA || 1-39-29
      akrUrastvandhakaiH sArdhamapAyAdbharatarShabha |
      hatvA satrAjitaM yuddhe sahabandhuM mahAbalam || 1-39-30
      j~nAtibhedabhayAtkR^iShnastamupekShitavAnatha |
      apayAte tathAkrUre nAvarShatpAkashAsanaH || 1-39-31
      anAvR^iSTyA yadA rAjyamabhavadbahudhA kR^isham |
      tataH prasAdayAmAsurakrUraM kukurAndhakAH || 1-39-32
      punardvAravatIM prApte tasmin dAnapatau tataH |
      pravavarShe sahasrAkShaH kachChe jalanidhestadA || 1-39-33
      kanyAM cha vAsudevAyA svasAraM shIlasaMmatAm |
      akrUraH pradadau dhImAnprItyarthaM kurunandana  || 1-39-34
      atha vij~nAya yogena kR^iShNo babhrugataM maNim |
      sabhAmadhye gataM prAha tamakrUraM janArdanaH || 1-39-35
      yattadratnaM maNivaraM tava hastagataM vibho |
      tatprayachChasva mAnArhaM mayi mAnAryakaM kR^ithAH || 1-39-36
      ShaShTivarShe gate kAle yadroSho.abhUnmamAnagha |
      sa saMrUDho.asakR^itprAptastataH kAlAtyayo mahAn || 1-39-37
      tataH kR^iShNasya vachanAtsarvasAttvatasaMsadi |
      pradadau taM maNiM babhrurakleshena mahAmatiH || 1-39-38
      tatastamArjavaprAptaM babhrorhastAdariMdamaH |
      dadau hR^iShTamanAH kR^IShNastaM maNiM babhrave punaH  || 1-39-39
      sa kR^iShNahastAtsaMprAptaM maNiratnaM syamantakam |
      Abadhya gAndhinIputro virarAjAMshumAniva || 1-39-40
      yastvevaM shR^iNuyAnnityaM shuchirbhUtvA samAhitaH |
      sukhAnAM sakalAnAM cha phalabhAgIha jAyate || 1-39-41
      AbrahmabhuvanAchchApi yashaH khyAtirna saMshayaH |
      bhaviShyati nR^ipashreShTha satyametadbravImi te || 1-39-42
      
      iti shrImanmahAbhArate khileShu harivaMshe
       harivaMshaparvaNyekonachatvAriMsho.adhyAyaH