##Harivamsha Maha Puranam - Part 3 - Bhavishya Parva
Chapter 76 Krishna goes to Badarika ashram 
Itranslated by G. Shchhaufelberger schhaufel@wanadoo.fr
July 18, 2008##
Proof-read by  K S Rmachandran, ramachandran_ksr @ yahoo.ca.
If you find any errors compared to Chitrashala Press edn,
send corrections to A. Harindranath harindranath_a @ yahoo.com
----------------------------------------------------------------
atha ShaTsaptatitamo.adhyAyaH
shrIkR^iShNasya badarikAshramagamanam


vaishampAyana uvAcha

tataH saMchintayAmAsa garuDaM pakShipuMgavam |
     AgachCha tvaritaM tArkShya iti viShNurjagatpatiH ||3-76-1
     tataH sa bhagavAMstArkShyo vedarAshiriti smR^itaH |
     balavAnvikramI yogI shAstranetA kurUdvaha ||3-76-2
     yaj~namUrtiH purANAtmA sAmamUrdhA cha pAvanaH |
     R^igvedapakShavAnpakShI pi~Ngalo jaTilAkR^itiH ||3-76-3
     tAmratuNDaH somaharaH shakrajetA mahAshirAH |           
     pannagAriH padmanetraH  sAkShAdviShNurivAparaH ||3-76-4
     vAhanaM devadevasya dAnavIgarbhakR^intanaH |            
     rAkShasAsurasa~NghAnAM jetA pakShabalena yaH ||3-76-5
     prAdurAsInmahAvIryaH keshavasyAgratastadA |             
     jAnubhyAmapatadbhUmau namo viShNo jagatpate ||3-76-6
     namaste devadevesha hare svAminniti bruvan |        
     pasparsha pANinA kR^iShNaH svAgataM tArkShyapuMgavam ||3-76-7
     ityuvAcha tadA tArkShyaM yAsye kailAsaparvatam | 
     shUlinam draShTumichChAmi sha~NkaraM shAshvataM shivam ||3-76-8
     bADamityabravIttArkShya AruhyainaM janArdanaH |
     tiShThadhvamiti hovAcha yAdavAnpArshvavartinaH ||3-76-9
     tato yayau jagannAtho dishaM prAguttarAM hariH |
     raveNa mahatA tArkShyastrailokyaM samakaMpayat ||3-76-10
     sAgaraM kShobhayAmAsa padbhyAM pakShI vrajaMstadA |  
     pakSheNa parvatAnsarvAnvahandevaM janArdanam ||3-76-11
     tato devAH sagandharvA AkAshe.adhiShThitAstadA |        
     tuShTuvuH puNDarIkAkShaM vAgbhiriShTAbhirIshvaram ||3-76-12
     jaya deva jagannAtha jaya viShNo jagatpate |
     jayAjeya namo deva bhUtabhAvanabhAvana ||3-76-13
     namaH paramasiMhAya daityadAnavanAshana |            
     jayAjeya hare deva yogidhyeya parAgata ||3-76-14
     nArAyaNa namo deva kR^iShNa kR^iShNa hare hare |
     AdikartaH purANAtmanbrahmayone sanAtana ||3-76-15
     namaste sakaleshAya nirguNAya guNAtmane |
     bhaktipriyAya bhaktAya namo dAnavanAshana ||3-76-16
     achintyamUrtaye tubhyaM namaste sakaleshvara |        
     ityAdibhistadA devaM vAgbhirIshAnamavyayam ||3-76-17
     tuShTuvurdevagandharvA R^iShayaH siddhachAraNAH |
     shR^iNvannevaM jagannAthaH stutivAkyAni tAni cha ||3-76-18
     yayau sArdhaM suragaNairmunibhirvedapAragaiH |         
     yatra pUrvaM svayaM viShNustapastepe sudAruNam  3-76-19
     lokavR^iddhikaraH shrImA.NllokAnAM hitakAmyayA |         
     varShAyutaM tapastaptaM  viShNunA prabhaviShNunA ||3-76-20
     yatra viShNurjagannAthastapastaptvA sudAruNam |
     dvidhAkarotsvamAtmAnaM naranArAyaNAkhyayA  ||3-76-21
     ga~NgA yatra sarichChreShThA madhye dhAvati pAvanI |
     yatra shakraH svayaM hatvA vR^itraM vedArthatattvagam ||3-76-22
     brahmahatyAvinAshArthaM tapo varShAyutaM charat |      
     yatra siddhAshcha siddhAH syurdhyAtvA devaM janArdanam ||3-76-23
     yatra hatvA raNe rAmo rAvaNaM lokarAvaNam |            
     etachChAsanamichChaMshcha tapo ghoramatapyata ||3-76-24
     devAshcha munayashchaiva siddhiM yAnti shuchivratAH |      
     yatra nityaM jagannAthaH sAkShAdvasati keshavaH ||3-76-25
     yatra yaj~nAH pravartante nityaM munigaNaiH saha |
     yasyAH smaraNamAtreNa naraH svargaM gamiShyati ||3-76-26
     svargasopAnamichChanti yAM puNyAM munisattamAH |     
     shatravo mitratAM yAnti yatra nityaM nR^ipottamam ||3-76-27
     yAmAhuH puNyashIlAnAM stAnamuttamadharmiNAm |         
     yatra viShNuM samArAdhya devAH svargaM samAyayuH ||3-76-28 
     siddhakShetramidaM prAhurR^iShayo vItamatsarAH |
     vishAlAM badarIM viShNustAM draShTuM sakaleshvaraH ||3-76-29
     sAyAhne chAmaragaNairmunibhistattvadarshibhiH |
     pravivesha mahApuNyamR^iShijuShTaM tapovanam ||3-76-30
     agnihotrAkule kAle pakShivyAhArasaMkule |
     nIDasteShu viha~NgeShu duhyamAnAsu goShu cha  ||3-76-31
     R^iShiShvapyatha tiShThatsu munivIreShu sarvataH |
     samAdhistheShu siddheShu chintayatsu janArdanam ||3-76-32
     adhishriteShu haviShu jvAlyamAneShu chAgniShu |
     hUyamAneShu tatraiva pAvakeShu samantataH ||3-76-33
     atithau pUjyamAne cha samdhyAviShTe jaganmaye |        
     sa tasyAmatha velAyAM devaiH saha janArdanaH ||3-76-34
     vivesha badarIM viShNurmunijuShTAM tapomayIm |
     AshramasyAtha madhyaM tu pravishya harirIshvaraH ||3-76-35
     garuDAdavarUhyAtha dIpikAdIpite tadA |               
     praveshe punDarIkAkShaH sthitastAvatsahAmaraiH ||3-76-36

iti shrImahAbhArate khileShu harivaMshe bhavishyaparvaNi 
kailAsayAtrAyAM ShaTsaptatitamo.adhyAyaH